- राजु तामाङ, बागमति ।
मकवानपुर जिल्लाको पुर्वी गाउँ बागमती गाउँपालिकाको राईगाउँमा ल्होछार मेला तथा सांस्कृतिक कार्यक्रम हुने भएको छ । तामाङ समुदायको राष्ट्रिय सांस्कृतिक पर्व सोनाम ल्होछार २८६० डुक ल्हो (गरुड वर्ग) को शुभ अवसरमा यही माघ २२ गते सोमबार राईगाउँ बजारमा ल्होछार मेला तथा सांस्कृतिक कार्यक्रम हुने भएको हो ।
स्थानीय राईगाउँ युवा क्लबको आयोजनामा हाम्रो संस्कृति हाम्रो शान, पर्यटन प्रवर्द्धनका लागि ल्होछार अभियान भन्ने नाराका साथ तामाङ समुदायको कला, संस्कृति, भेषभुषा र परम्परालाई संरक्षण र प्रवर्द्धन गर्ने उद्देश्य सहित ल्होछारको शुभकामना आदानप्रदान तथा सांस्कृतिक कार्यक्रम आयोजना गरिएको क्लवका अध्यक्ष तथा मेला संयोजक युवा समाजसेवी छवि बोम्जनले जानकारी गराए ।
ल्होछार मेला तथा सांस्कृतिक कार्यक्रममा तामाङ संस्कृति, भेषभुषा तथा विभिन्न खानाको स्टलहरु राखिने र थप मनोरञ्जनका लागि भने राष्ट्रिय चर्चित गायक/गायिकाहरु विशाल काल्तान, फुल कुमार बोम्जन, प्रकाश तितुङ, जीवन बोम्जन, रेश्मा बोम्जन, जितु लोप्चन, लक्ष्मी स्याङ्तान, सुमिना लो तथा नायिका सुनिता लुङ्बाको समेत प्रस्तुति रहने आयोजकले बताए ।
ल्होछार मेलाको सांस्कृतिक कार्यक्रम साँझ ५ बजेबाट सुरु हुनेछ उक्त कार्यक्रमलाई भव्य र सभ्य रुपमा सफल बनाउन र भरपुर मनोरञ्जन लिनका लागि सम्पूर्ण ल्होछार प्रेमी दर्शक महानुभावहरुलाई आयोजकको तर्फबाट निमन्त्रणा गरिएको छ ।
