लालबन्दी । मैनाली समाज नेपाल जिल्ला कार्य समिति सर्लाहीको १० औँ वार्षिक साधारणसभा सम्पन्न भएको छ ।
समितिका जिल्ला अध्यक्ष केदारनाथ मैनालीको अध्यक्षतामा ईश्वरपुर नगरपालिका ६ स्थित गल्ला व्यापार संघको सभा हलमा साधारण सभा सम्पन्न भएको हो ।
साधारण सभाको अवसरमा नारायण माध्यमिक विद्यालय बयलवासका ६ देखि १० कक्षासम्मका एक जना छात्र, एक जना छात्रा गरी १० जना जेहेन्दार तथा अतिविपन्न विद्यार्थीलाई जनही ५ हजार नगदसहित कदर–पत्र प्रदान गरी सम्मान गरिएको समाजले जनाएको छ ।
त्यस्तै, मैनाली समुदायबाट गत वर्षको एसइइमा उत्कृष्ट अंक ल्याउने सामुदायिक विद्यालयतर्फ तीन जना र निजी विद्यालयतर्फ दुई जना गरी ५ जनालाई पनि नगद तथा कदर–पत्रबाट सम्मान गरिएको कार्य समितिका सदस्य डिल्लीप्रसाद मैनालीले जानकारी दिनुभयो । मैनाली समाज नेपालले एक घर एक आजिवन सदस्य प्रदान गर्ने अभियान अन्तर्गत हालसम्म २८४ जनाले आजिवन सदस्यता लिएका जनाएको छ ।
सभामा एक वर्षभित्र ११ जना दिवंगत मैनाली बन्धुहरुप्रति श्रद्धासुमन व्यक्त गरिएको छ । समाजले सामाजिक कार्य अन्तर्गत निकट भविष्यमा रक्तदान कार्यक्रम आयोजना गर्ने तथा लालबन्दीस्थित निर्माणाधीन राधाकृष्ण वैदिक गुरुकुलमको भवनका लागि आर्थिक सहयोग गर्ने सभाबाटै निर्णय गरेको समाजका उपाध्यक्ष विष्णुहरि मैनालीले बताउनुभयो ।
सभामा नारायण मा.वि.का प्रधानाध्यापक फणिराज बराल, कुटुमेली समाजका सुशीलकुमार थपलिया, शिवकृष्ण उप्रेती, उज्वल शर्मा, रत्न प्रसाई, खगेन्द्र पौडेललगायतको आतिथ्यता रहेको थियो ।
