सर्लाही, असार ५ : प्रहरीले सदरमुकाम मलंगवाबाट स्रोत नखुलेको १५ लाख रुपैयाँसहित २ युवकलाई पक्राउ गरेको छ ।
पक्राउ पर्नेमा मलंगवा नगरपालिका ४ का अन्दाजी ३५ वर्षीय युवक विसुन्द्र प्रसाद चौधरी र मलंगवा नगरपालिका – २ का अन्दाजी ४० वर्षीय नागेन्द्र ठाकुर रहेका छन् । उनिहररूलाई मंगलवार बिहान साढे सात बजे भारतको सोनबर्षाबाट नेपालतर्फ आउँदै गर्दा सीमावर्ती क्षेत्र गोरखकाली चौकमा प्रहरीले शंका लागि चेकजाँच गरेको थियो ।
जिल्ला प्रहरी कार्यालय सर्लाहीका सूचना अधिकृत डिएसपी दिपेन्द्र पंजियारका अनुसार भारतीय BR 30 S 2086 नम्बरको मोटरसाईकलमा आएका उनीहरूलाई रोकेर चेकजाँच गर्दा पछाडी बसेका ठाकुरको कम्मरमा बाँधिएको खैरो कपडाको पटुका भित्र १५ लाख ५० रुपैयाँ नेपाली तथा चालक चौधरीको साथबाट दुई हजार ६४० भारु नोट तथा ८ बोतल मजा जुस र दुईथान रियलमिको मोबाईल सेट एवं दुई थान सिम समेत बरामद गरि आवश्यक कार्बाही प्रकृया अगाडि बढाएको छ।
