आर्यन सिग्देलको मुख्य भूमिका रहने फिल्म ‘सायरा’को निर्माण घोषणा गरिएको छ। मंगलबार काठमाडौंमा एक कार्यक्रम आयोजना गर्दै फिल्मको औपचारिक निर्माण घोषणा गरिएको हो।
नेपाली र भारतीय फिल्मकर्मीको संयुक्त लगानीमा बन्ने फिल्मलाई बलिउड निर्देशक विशाल देसाईले निर्देशन गर्नेछन्।
फिल्ममा बलिउड निर्माता तथा निर्देशक पुस्कर झाको निर्माण रहनेछ। पुस्करसँग नेपाली ब्यानर डीबीआर मिडिया एण्ड मुभिज प्राली र आइविल प्रोडक्सन अस्ट्रेलियाको संयुक्त लगानी रहनेछ।
निर्देशक विशाल देसाईले नेप-इन्डो प्रोजेक्टमा जोडिन पाउँदा उत्साहित रहेको बताए। मलाई निर्देशकको रुपमा छनोट गर्न भएकोमा उत्साहित छु। यस प्रोजेक्टमार्फत हाम्रो दुई छिमेकी मुलुकको मित्रता अझ बढ्छ भन्ने आशा छ,’ उनले भने। निर्माता तथा निर्देशक पुस्करले नेपाली फिल्म बनाउन पाउँदा खुशी रहेको बताए।
‘नेपाली फिल्म बनाउने इच्छा थियो। अहिले यो सहकार्य हुँदा म उत्साहित छु। नेपाली फिल्मलाई हिन्दी भाषामार्फत विश्व बजारमा लैजाने मसहित टिमको तयारी छ। हामीले यसलाई हलसँगै ओटीटी पनि रिलिज गर्ने छौं,’ उनले भने। यो फिल्म नेपाली र हिन्दी भाषामा प्रदर्शन गरिने पत्रकार सम्मेलनमा जानकारी दिइएको छ।
फिल्ममा आर्यन सिग्देल, भारतीय अभिनेत्री सुफिया सिद्दिकी, कविता नेपालीलगायत कलाकारको अभिनय रहने छ। डान्सिङ रियालिटी शोमार्फत चर्चामा आएकी कविता नेपाली यसै फिल्ममार्फत डेब्यु गर्दैछिन्।
फिल्मको अन्य कलाकार तथा प्राविधिकको बारेमा छिटै जानकारी दिने समेत प्रस्तुतकर्ता रघु परियारले बताए। यसमा नेपाल र भारत दुवै देशका कलाकारको अभिनय रहनेछ ।दसैंपछि छायांकन गरिने यस फिल्मको सुटिङ ९० प्रतिशत अष्ट्रेलियामा र १० प्रतिशत नेपालमा हुने निर्माण टिमले जानकारी दिएको छ।
