लालबन्दी : जाडोले कठ्यांग्रीएर मृत्यु भएका हरिपुरका २ परिवारलाई सांसद बेची लुंगेलीले समवेदना प्रकट गर्नुभएको छ । सांसद लुंगेली बुधवार मृतकद्वयकै घरमा पुगेर शोकाकुल परिवारमा समवेदना प्रकट गर्नुभएको हो ।
करिव एक हप्ता अगाडि हरिपुर ६ लक्ष्मिपुरका राम भगत माझि र वडा नम्बर ९ पिडारीका राजेन्द्र चौधरीको चिसोले कठयांग्रीएर मृृत्यु भएको थियो । तर मृत्युबारे परिवार तथा स्थानियले कसैलाई खबर गरेका थिएनन् । पछि केहि संचारमाध्यममा समाचार प्रकाशन भएपछि उनिहरुको मृत्युको खबर देशभरी फैलिएको थियो ।
सांसद लुंगेलीले समवेदना भेटमा मृतक परिवारलाई केहि न्यानो ओढ्ना र खाद्यान्न प्रदान गर्नुभएको स्थानियले बताएका छन ।
सांसद लुंगेलीले सो क्षेत्रका अति बिपन्न मुसहर समुदायमा बागमति सेवा समाजसँग सहकार्य गरि न्यानो कपडा बितरण गर्ने जानकारी दिनुभएको छ । जिल्लास्थित डिभिजन बन कार्यालयसँग आवश्यक प्रकृया पुरा गरि सो क्षेत्रमा आगो ताप्नका लागी दाउरा बितरण गर्ने योजनासहित उनिहरुलाई तराईको चिसोबाट जोगाउन आफुले सकेको प्रयास गर्ने सांसद लुंगेलीले बताउनुभयो ।
जिल्लाका प्रभावितलाई चिसोबाट जोगाउन पुषको पहिलो सातासम्म पालिका र अन्य सरोकारवाला निकायले कुनै वास्ता गरेका छैनन् । पूर्ण अधिकार प्राप्त स्थानीय तहले आफ्नो पालिकाभित्र चिसोले कठ्यांग्रिएर केहीको मृत्यु भइसक्दा समेत न्यानो प्रदान गर्न चासो नदेखाएको भन्दै आलोचना गरिरहेका छन ।
