जग्गाको विवादमा कुटपीट हुँदा सर्लाहीमा एक बृद्धाको मृत्यु

लालबन्दी : सर्लाहीको चक्रघट्टा गाउँपालिका –२, भेल्हिमा जग्गाको विवादमा कुटपीट हुँदा एक जनाको मृत्यु भएको छ । सोमबार दिउँसो भएको घटनामा ७० वर्षीया सागर देवीको मृत्यु भएको हो ।

प्रहरीले कुटपीटमा संलग्न सागर देवीकै देवर ६५ वर्षीय पुकार रायलाई नियन्त्रणमा लिएको जनाएको छ । पुकारका छोरा जितु भन्ने जितेन्द्र राय र बुहारी अनितादेवी राय फरार रहेको र उनीहरुको खोजीकार्य भइरहेको प्रहरीले जनाएको छ ।

पुकार, छोरा जितेन्द्र र बुहारी अनिता मिलेर सागर देवीमाथि कुटपीट गरेको स्थानीयले बताएका छन् । घटना लगत्तै प्रहरीले पुकारलाई पक्राउ गरी जिल्ला प्रहरी कार्यालय मलङ्गवा ल्याएको छ ।

पुकार र उहाँका दाइबीच जग्गाको विषयमा पुरानो विवाद रहेको बुझिएको सर्लाहीका प्रहरी उपरीक्षक प्रवीण पोखरेलले जानकारी दिनुभयो ।