लालबन्दी : सर्लाहीको ब्रम्हपुरीमा मंगलवार पोखरीमा डुबेर एक बालीकाको ज्यान गएको छ । ब्रम्हपुरी गाउँपालिका वडा नम्बर ६ नौकिलवा बस्ने देवशरण रायको छोरी अन्दाजी बर्ष १० कि उषा कुमारी यादवको मृत्यु भएको प्रहरीले जनाएको छ ।
बिहान १० बजेतिर घरबाट हराएकी उषालाई खोजतलास गर्ने क्रममा साँझ साँडे ७ बजे स्थानिय रत्नेश्वर रायको पोखरीमा डुबेर मृत्यु भएको अवस्थामा शव फेला परेको थियो । छोरी हराएको अवस्थामा खोजी गर्दै जाँदा उनकी आमाले घरबाट ४०० मिटर परको पोखरीमा शव फेला पारेपछि प्रहरीलाई खबर पुगेको जिल्ला प्रहरी कार्यालय सर्लाहीका प्रवक्ता एवं डिएसपी बिजय श्रेष्ठले जानकारी दिनुभयो ।
त्यसैगरि मंगलवार राति घरको बरण्डाबाट लडेर नवलपुरमा एक बृद्धको ज्यान गएको छ । धनुषाको गणेशमान चारनाथ ४ बिरेन्द्र बजार घर भई लालबन्दी नगरपालिका १ नवलपुरमा डेरा गरि बस्दै आएका अन्दाजी बर्ष ५० का भरतलाल लामाको ज्यान गएको प्रहरीले जनायो ।
स्थानिय संजय कुशवाहको घरमा डेरा गरि बस्ने लामा राति साँडे ८ बजेतिर तिनतले घरको बरण्डामा बस्ने क्रममा तल खसेका थिए । उनलाई तत्कालै उपचारका लागी हरिवनस्थित नमुना अस्पताल पु¥याईएको भएपनि चिकित्सकले मृत घोषणा गरेका थिए ।
मृतक दुबैको शव पोष्टमार्टमका लागी प्रादेशिक अस्पताल सदरमुकाम मलंगवा लगिएको छ ।
