यस वर्ष लुबाट कम्तीमा ३० जनाको मृत्यु भएपछि थाइल्यान्डले बिहीबार तातो मौसमको चेतावनी जारी गरेको छ । तापक्रम ५२ डिग्री सेल्सियसभन्दा माथि जाने अपेक्षा गरिएपछि थाई राजधानी बैंककमा अधिकारीहरूले अत्यधिक गर्मीको चेतावनी दिएका हुन् ।

बैङ्ककको कङ्क्रिटले फैलिएको क्षेत्रमा तापक्रम बुधबार ४० दशमलव एक डिग्री सेल्सियससम्म पुगेको थियो । बिहीबार पनि यस्तै स्तरको पूर्वानुमान लगाइएको थियो । यस साता दक्षिण र दक्षिणपूर्वी एसियाका केही भागमा असाधारण तातो मौसमको लहर चलिरहेको छ । यसका कारण फिलिपिन्सभर विद्यालय बन्द गर्नुपर्यो भने बङ्गलादेशमा उपासकहरूले वर्षाका लागि प्रार्थना गर्नुपरेको छ ।

तापक्रम सूचक (आद्र्रता, हावाको गति र अन्य कारकहरूलाई ध्यानमा राख्दै महसुस गरिने तापक्रमको मापन) बैङ्ककमा ‘अत्यन्त खतरनाक’ स्तरमा रहेको सहरको पर्यावरण विभागले चेतावनी दिएको छ । मुलुकको ग्रामीण उत्तरपूर्वमा रहेको उडोन थानी प्रान्तका अधिकारीहरूले पनि बिहीबार तीव्र तापक्रमको चेतावनी दिएका छन् ।

स्वास्थ्य मन्त्रालयले बुधबार राति जनवरी १ देखि अप्रिल १७ को बीच लुबाट ३० जनाको मृत्यु भएको जानकारी दिएको छ । लुबाट सन् २०२३ मा ३७ जनाको मृत्यु भएको थियो ।

अधिकारीहरूले वृद्धवृद्धा र मोटोपनालगायत अन्तर्निहित अवस्था भएका मानिसहरूलाई घरभित्रै रहन र नियमितरूपमा पानी पिउन आग्रह गरिरहेको थाइल्यान्डका रोग नियन्त्रण विभागका उपमहानिर्देशक डायरेक खाम्पेनले बताए ।

थाइल्यान्ड र दक्षिणपूर्वी एसियाका मुलुकहरूमा अप्रिल सामान्यतया वर्षको सबैभन्दा तातो समय हो तर यस वर्ष अल निनो मौसमी ढाँचाले गर्मीलाई अझ बढाएको छ । गत वर्ष विश्वभर गर्मीको तनाव रेकर्डस्तरमा देखिएको थियो । संयुक्त राष्ट्रसङ्घको मौसम तथा जलवायु एजेन्सीले एसिया विशेषरूपमा द्रुत गतिमा तातो भइरहेको बताएको थियो ।

यस साता थाइल्यान्डमा भीषण गर्मी अनुभव गरिएको छ । सोमबार उत्तरी प्रान्त लाम्पाङमा ४४ दशमलव दुई डिग्री सेल्सियस तापक्रम रेकर्ड गरिएको छ । यो गत वर्षको ४४ दशमलव छ डिग्री सेल्सियसको सर्वकालीन राष्ट्रिय रेकर्डभन्दा केही कम हो ।

सीमामा रहेको म्यान्मामा बुधबार तापक्रम ४५ दशमलव नौ डिग्री सेल्सियससम्म पुगेको थियो र बिहीबार पनि तापक्रम यति हुने अपेक्षा गरिएको छ । सन् २०२१ को सैन्य विद्रोहबाट उत्पन्न अराजकता र सङ्घर्षका कारण म्यान्माका अधिकांश भागमा विद्युत् बन्द भएको छ । यसबाट मानिसहरूलाई पङ्खा र एयर कन्डिसनका साथ चिसोमा बस्न अवरोध पुगेको छ ।

गृहमन्त्रालयले विशिष्ठ व्यक्तिहरुको सुरक्षा व्यवस्थापन कार्यविधि, २०७७ र अन्य प्रचलित कानून बमोजिम विशिष्ठ व्यक्तिहरुलाई उपलब्ध गराइएका सुरक्षाकर्मीहरु बाहेक अन्य सबै व्यक्तिगत सुरक्षाकर्मीहरु पदाधिकार रहेको कार्यालयमा यथाशिघ्र २४ घण्टाभित्र फिर्ता बोलाई सो काे विवरण उपलब्ध गराउन प्रहरी प्रधान कार्यालय र सशस्त्र प्रहरी बल, नेपाल, प्रधान कार्यालयलाई निर्देशन दिएको छ।

त्यस्तै, गृहले विशिष्ठ व्यक्तिहरुको जिल्ला भ्रमण लगायतका कार्यक्रममा सुरक्षा उपलब्ध गराउँदा कार्यविधिको व्यवस्था पूर्ण पालना गर्न र गराउन र सुरक्षा चुनौती विश्लेषण गरी मन्त्रालयबाट थप निर्देशन भएको अवस्थामा बाहेक कार्यविधि विपरीत अगुवा पछुवा उपलब्ध नगराउन पनि दुबै प्रहरी संगठनलाई निर्देशन दिएको छ।

मन्त्रालयले यसरी खटिएका सुरक्षाकर्मी फिर्ता नभएमा खटिने सुरक्षाकर्मीको तलब रोक्का गर्न र फिर्ता नगर्ने पदाधिकारीको नाम सार्वजनिक गर्ने प्रयोजनका लागि मन्त्रालयमा विवरण उपलब्ध गराउन समेत निर्देशन दिएको छ।

उपप्रधान एवं गृहमन्त्रीस्तरीय निर्णयपछि मन्त्रालयले यस्तो निर्देशन गरेको हो। ‘एकातिर शान्ति सुरक्षा कायम गर्ने तथा सीमा सुरक्षा पोष्टमा खटिने सुरक्षाकर्मी कमी हुने अर्कातिर विशिष्ठ पदाधिकारीले व्यक्तिगत कामका लागि राष्ट्रसेवक प्रयोग गर्ने प्रचलनको अन्त्य आवश्यक छ। त्यसैको सुरुआतका लागि यो निर्णय गरिएको हो’ उपप्रधान एवं गृहमन्त्री रवि लामिछाने भने। मन्त्री लामिछानेले विशिष्ठ व्यक्तिहरुको सुरक्षा व्यवस्थापन कार्यविधि, २०७७ लाई समयानुकूल परिमार्जनको गृहकार्य भइरहेको पनि जानकारी दिए।

राैतहट । नेपाली काँग्रेसका नेता एवम पूर्वमन्त्री मोहम्मद अफताब आलम सहित चार जना लाई जिल्ला अदालत गौरले जन्मकैदको सजाय सुनाएको छ ।

२२ औ पटकको पेशीमा नेपाली कांग्रेसका नेता तथा पूर्व मन्त्री मोहम्मद अफताब आलमविरुद्धको मुद्दा किनारा लागेको छ । न्यायधिश मातृका प्रसाद आचार्यको ईजलासले मोहम्मद अफताब आलम, मोहम्मद महताब आलम, शेख शेराज भन्ने शेख सराज, बद्री सहनी लाई साबिक मुलुकी ऐन अनुसार जन्मकैदको सजाय सुनाएको हो । प्रतिबादी मुक्ति साहले भने सफाई पाएका छन । फरार रहेका शेख फजलेहक, शेख भदइ, सगिर आलम, गौरी शंकर साह, मोहम्मद मोबिन आलम, शेख जुमईन भन्ने शेख मलकाराको मुध्दा भने मुल्तबीमा राखेको जिल्ला अदालत गौकार स्रेस्तेदार उद्धब ढोडारीले बताउनुभयो ।

गत सोमबार देखि निरन्तर भएको बहशमा बिहिबार फैसला सुनाइएको छ । पटक पटकको पेशीपछि गत कात्तिक २२ गते वादी र प्रतिवादीलाई रौतहट जिल्ला अदालतका न्यायाधीश बाबुकाजी बानियाँको इजलासले १५ दिनभित्र लिखित जवाफ पेश गर्न आदेश दिएपछि मुध्दा चाडै टुङ्गिने अपेक्षा गरिएको थियो ।

त्यसपछि पनि साक्षि झिकाउने लगायतका आदेश भएपछि मुध्दा झनै लम्बिएको हो । मङ्सिर १५ गतेसम्म दुवै पक्षले बहस नोट बुझाइसक्नु पर्नेमा जिल्ला सरकारी वकिल कार्यालय रौतहटले समय अभाव भएको भन्दै थप एक साताको समय माग गरेपछि मङ्सिर २४ गते दुबैपक्षले बहस नोट बुझाएको थियो । २०७६ कात्तिक १८ गते रौतहट जिल्ला अदालतमा दर्ता भएको ‘विस्फोटक पदार्थ बम समेतको प्रयोग गरी ज्यान मार्ने उद्योग तथा कर्तव्य ज्यान सम्बन्धीको कसूरमा आलमसहित ११ जना लाई प्रतिवादी बनाइएको थियो ।

२०६४ साल चैत २७ गते संविधानसभा निर्वाचनको पूर्व सन्ध्यामा साबिक रौतहट गाविसको राजपुर फरहदवा वडा नम्बर ४ मा रहेको नेपाली कांग्रेसका उम्मेदवार समेत रहेका मोहम्मद अफताब आलमको घरमा बम विष्फोट हुँदा घाईते भएका पिन्टु भन्ने त्रिलोक प्रताप सिंह र ओसी अख्तर मियाँ लाई इँटा भट्टाको चिम्नीमा जलाई मारेको आरोपमा बिस्फोटक पदार्थ बम समेतको प्रयोग गरीज्यान मार्ने उधोग तथा कर्तब्य ज्यान सम्बन्धिको कसुरमा मुध्दा चलाइएको हो ।

घटनाको तीन दिनपछि २०६४ चैत ३० गते आलमसँगै निर्वाचन लडेका शैलेन्द्र साहले प्रहरीमा दिएको निवेदनका आधारमा प्रहरीले प्रारम्भिक अनुसन्धान गरी जिल्ला सरकारी वकिल कार्यालय, रौतहटमा कारबाहीका लागि रायसहितको प्रतिवेदन बुझाएकोमा मुद्दा नचल्ने निर्णय गभएको थियो । त्यसपछि उक्त निर्णय महान्यायाधिवक्ता कार्यालयबाट पनि सदर भए पछि सर्वोच्च अदालतमा महान्यायाधिवक्ता कार्यालयको निर्णय बदर गराई मुद्दा चलाउने आदेश दिन माग गरिएको थियो ।

सर्वोच्च अदालतले २०६९ जेठ १६ गते महान्यायाधिवक्ता कार्यालयको निर्णयविरुद्ध परेको रिटमा फैसला सुनाउँदै उक्त मुद्दामा गम्भीर रूपले अनुसन्धान गरी मुद्दा चलाउनु भन्दै सरकारको नाममा निर्देशनात्मक आदेश समेत दिएको थियो ।

सर्वोच्चको उक्त फैसला पुनरावलोकन गरिपाऊँ भनी महान्यायाधिवक्ता कार्यालय सर्वोच्च पुगेको भए पनि सर्वोच्चले २०७० साउन ११ गते पुनरावलोकनको निस्सा दिन अस्वीकार गरेको थियो ।

रौतहट प्रहरीले ०७६ असोज २६ गते आलम लाई पक्राउ गरी मुुध्दा चलाएको थियो । उनीमाथि १८ कात्तिक २०७६ मा रौतहट जिल्ला अदालतमा ‘विस्फोटक पदार्थ बम समेतको प्रयोग गरी ज्यान मार्ने उद्योग तथा कर्तव्य ज्यानसम्बन्धी कसुर’मा मुद्दा दायर भएपछि थुनछेक बहसमा २०७६ कात्तिक २९ गते देखि आलम पुर्पक्षका लागि थुनामा रहदै आएका थिए ।

नेपाल समाचारपत्रबाट…

लालबन्दी । सर्लाहीको लालबन्दी नगरपालिका १३ पत्थरकोटमा रहेको राजदेवी ईंग्लिस स्कुलले सोमबार बिहान नतिजा प्रकाशन कार्यक्रम सम्पन्न गरेको छ ।

बिद्यार्थी, अभिभावक, प्रहरी, पत्रकार लगाएतको उपस्थितीमा स्कुलले नतिजा प्रकाशन तथा पुरस्कार वितरण कार्यक्रम गरेको हो । कक्षा ६ सम्म अध्यापन हुने स्कुलमा हाल करिव ३०० बिद्यार्थी अध्ययनरत छन ।

स्कुलका संस्थापक राजकुमार श्रेष्ठको अध्यक्षतामा प्याप्सन केन्द्रिय सदस्य एवम् लालबन्दी ८ मा रहेको रकभेल बोर्डिङ स्कुलका संस्थापक/प्रिन्सिपल सागर गिरी, एन. प्याब्सनका पूर्व कोषाध्यक्ष एवम् लब्ली सेपल्स ईंग्लिस बोर्डिङ स्कुलका संस्थापक/प्रिन्सिपल भुपेन्द्रलाल कर्ण, प्रहरी चौकि पत्थरकोटका प्रमुख प्रहरी सहायक निरिक्षक मोतिराम महतो, लिड मिडिया नेटवर्क तथा लालबन्दी पोस्ट दैनिकका अध्यक्ष पत्रकार क्षितिज विश्वकर्मा, बिद्यार्थी, अभिभावकको उपस्थितीमा कार्यक्रम सम्पन्न भएको हो ।

पत्थरकोट जस्तो बिकट क्षेत्रमा रहेर पनि जिल्लाका धेरै पालिकाका बिद्यार्थी अध्ययन गराउन सफल र बिद्यार्थीको आकर्षणको केन्द्र बन्न सफल बिद्यालयको प्रगतिको कामना गर्दै उतिर्ण हुने सबै बिद्यार्थीलाई प्रमुख अतिथी एवं रकभेल स्कुलका संस्थापक/प्रिन्सिपल सागर गिरीले बधाई तथा शुभकामना दिनुभयो ।

लालबन्दी । सर्लाहीमा शुक्रबार बिहानै खेत जोत्दै गरेका ट्रयाक्टर चालको करेन्ट लागेर मृत्यु भएको छ । जिल्लाको ब्रह्मपुरी गाउँपालिका–२, मा चैते धान रोप्न खेत जोत्दै गर्दा पानी तान्ने मोटरबाट करेन्ट लागेर ट्रयाक्टर चालक ब्रह्मपुरी गाउँपालिका–२, निवासी २७ बर्षिय राजेश पासवानको मृत्यु भएको हो ।

जिल्ला प्रहरी कार्यालय सर्लाहीका अनुसार ज १ त ४११४ नम्बरको ट्रयाक्टर चालक पासवानलाई खेतमा पानी तानिरहेको मोटरबाट करेन्ट लागको थियो । करेन्ट लागेर गम्भिर बनेका पासवानलाई उपचारको लागि प्रादेशिक अस्पताल मलंगवा लगीएको भएपनि चिकित्सकले मृत घोषणा गरेका जिल्ला प्रहरी कार्यलय सर्लाहीका सूचना अधिकारी एवं प्रहरी नायव उपरीक्षक दिपक श्रेष्ठले जानकारी दिए ।

पासवानको सव परिक्षणको लागि प्रादेशिक अस्पतालमा राखिएको र घटनाको थप अनुसन्धान भईरहेको श्रेष्ठले बताए ।

लालबन्दी । सर्लाहीमा पेस्तोलमा प्रयोग हुने ५३ राउण्ड गोली फेला परेको छ । नेपाल भारत सिमा नजिक जिल्ला सदरमुकाम मलंगवाको वडा नम्बर ८ गोरखकालीमा मोटरसाईकल ग्यारेजको अगाडीबाट सो गोली बरामद भएको जिल्ला प्रहरी कार्यालय सर्लाहीले जनाएको छ ।

ईश्वरपुर नगरपालिका ५ बस्ने २८ बर्षका बिजय महतोले संचालन गरेको भोले बाबा अटो पार्ट्स एण्ड बिजय रिपेरिङ सेन्टर अगाडी खाली ठाउँमा कवाडी समान भएको ठाउँमा केएफ ७.६५ लेखिएको गोली बरामद भएको हो ।

गोप्य सुचनाको आधारमा जिल्ला प्रहरी कार्यालयबाट खटिएको प्रहरी निरिक्षक ओम प्रकाश यादवको टोलिले उक्त स्थानमा माटो मुनि करिव ७ ईन्च खाल्डो खनि गरगहना राख्ने सानो ब्यागमा गाडेर राखेको अवस्थामा गोली बरामद गरिएको र थप अनुसन्धान भईरहेको जिल्ला प्रहरी कार्यालयका सुचना अधिकारी डिएसपी दिपक श्रेष्ठले जानकारी दिए ।

क्षितिज विश्वकर्मा, लालबन्दी । सर्लाहीको लालबन्दीमा अघिल्लो महिना संचालित टमाटरको सस (केचव) बनाउने तालिममा सहभागीहरुलाई सस बनाउने बिभिन्न उपकरण हस्तान्तरण गरिएको छ ।

सोमबार वडा नम्बर ६ स्थित कार्यालय परिसरमा एक कार्यक्रम गरि तालिममा सहभागीहरुलाई सस उत्पादन गर्न आवश्य पर्ने पल्प मेसिनसहित आवश्यक पर्ने एक सेट प्रविधि हस्तान्तरण गरिएको नगरपालिकाको गरिवी निवारणका लागी लघु उद्यम विकास कार्यक्रम (मेड्पा) शाखाका बरिष्ठ उद्यम विकास सहजकर्ता समिर सुवेदीले जानकारी दिए । सहभागीहरुलाई फागुन १६ देखि २० गतेसम्म पहिलो समुह र २१ देखि २५ गतेसम्म दोश्रो समुहलाई व्यवसायीक टोम्याटो केचव बनाउने सिप विकास तालिम प्रदान गरिएको थियो । तालिममा सहभागी ५३ जनालाई भुगोल र सहजताका आधारमा ३ ओटा समुहमा बिभाजन गरेर सो सामाग्री हस्तान्तर गरिएको सुवदीले बताए ।

लघु घरेलु तथा साना उद्योग प्रवद्र्धन केन्द्र त्रिपुरेश्वर काठमाण्डौँको आर्थिक सहयोग लिएर लालबन्दी नगरपालिकाले आयोजना गरेको तालिममा नगरका १५ वटा वडा (७ र १४ बाहेक) का ५३ जनाको सहभागीता रहेको थियो । प्रविधि हस्तान्तरण कार्यक्रममा लालबन्दी नगरप्रमुख बासुदेव अधिकारी, उपप्रमुख कल्पनामाया पाख्रिन, प्रमुख प्रशासकिय अधिकृत बशन्त न्यौपाने, योजना शाखा प्रमुख रुपेश चौलागाईं, राजस्व शाखा प्रमुख गोपाल थापा, वडा नम्बर ६ का वडाध्यक्ष लालकुमार योञ्जन, ८ का शुक्र बहादुर पाख्रिन, मेड्पा) शाखाका रमेश कुमार घिमिरे लगाएतको सहभागीता रहेको थियो ।

तालिम पश्चात ब्यवसाय सुचारु गर्नका लागी आवश्यक प्राविधिक सामाग्री हस्तान्तरण गरिएको (मेड्पा) शाखाका घिमिरेले बताए । घरेलु तथा साना उद्योग विकास समितीका पूर्व उप निर्देशक राम बहादुर श्रेष्ठले तालिममा सहभागीलाई प्रशिक्षण दिएका थिए । कार्यक्रममा सहभागीहरुले यहाँ उत्पादन हुने आँप, मेवा जस्ता फलफुलबाट पनि यस्तै केहि बनाउन सकिने भए त्यस्तो तालिम पनि आयोजना गर्न लालबन्दी नगरपालिकासँग आग्रह गरेका थिए ।

लालबन्दी । सर्लाहीको नवलपुरबाट लागुऔषधसहित २ जना पक्राउ परेका छन । लालबन्दी १ नवलपुर चोकस्थि रेड चिल्लि होटल अगाडीबाट हरिपुर ७ चिताईनका २८ बर्षका पिन्टु कुमार गुप्ता र सोही ठाउँका ३० बर्षिय राजेश सहनी पक्राउ परेका हुन ।

जिल्ला सदरमुकाम मलंगवाबाट नवलपुरतर्फ आउँदै गरेका उनिहरु सवार ज४प ५१३६ नम्बरको मोटरसाईकल रोकि चेकजाँच गर्दा कालो प्लाष्टिकभित्र चाउचाउको कार्टुनमा ल्याउँदै गरेको नाइट्राभेट ट्याब्लेट १० एमजी तिन हजार पिस बरामद भएको ईलाका प्रहरी कार्यालय लालबन्दीले जनाएको छ । दिउँसो साँढे २ बजेतिर लागु औषध नियन्त्रण ब्युरो वीरगंजको बिशेष सुचनाको आधारमा उनिहरुलाई पक्राउ गर्न सफल भएको प्रहरीको दाबि छ ।

उनिहरुलाई मोटरसाईकलसहित नियन्त्रणमा लिएर आवश्यक अनुसन्धान भईरहेको ईलाका प्रहरी कार्यालय लालबन्दीका प्रमुख, प्रहरी निरिक्षक हरिबोल केसिले जानकारी दिए ।

• क्षितिज विश्वकर्मा, लालबन्दी ।

‘हामी सबैको एउटै सुर, बालविवाह मुक्त हाम्रो ईश्वरपुर’ भन्ने नारासहित सर्लाहीको ईश्वरपुर नगरपालिकामा सन्दर्भ संवाद कार्यक्रम सम्पन्न भएको छ । सेभ द चिल्ड्रेनको आर्थिक सहयोग, ईश्वरपुर नगरपालिकासँगको समन्वयमा ग्रामीण नारी उत्थान संघ हरिपुरले कार्यक्रमको आयोजना गरेको हो । विभिन्न वडाका बालबालिकालाई सहभागी गराएर बाल विवाहको अवस्था, बालविवाह हुँदा हुने हानी, कानूनी कारवाही, उजुरी, नियन्त्रणका लागि पालिकाको योजनालगायतबारे सरोकारवालाबीच सम्वाद गरिएको ग्रामीण नारी उत्थान संघको बाल विवाह न्यूनिकरण परियोजना (सीईएफएम) की संयोजक सिर्जना बस्नेतले जानकारी दिनुभयो ।

कार्यक्रममा सहभागी नगरभित्रका बिभिन्न बाल क्लवमा आवद्ध बालबालीकाहरुले संवादमा सहभागी सरोकारवाला निकायसँग आफ्नो जिज्ञासा राखेका थिए । ‘बिकृती र बिसङ्गती खोलामा बगाईदेउ, बाल विवाह गर्ने रहर छैन स्कुल पठाईदेउ’ भन्दै वाल तथा जबरजस्ति विवाहका बारेमा जिज्ञासा राखेका बालबालिकाले बालविवाह किन हुन्छ, यो कुप्रथालाई कसरी रोक्ने, बालविवाह गराउनेलाई कस्तो सजाय हुन्छ, बालविवाह मुक्त नगरपालिका बनाउनका लागी नगरपालिकाको योजना के छ, बाल विवाह हटाउनका लागी धार्मिक रुपमा केहि समस्या आईपर्छ ? जस्ता जिज्ञासा राखेका थिए ।

बालविवाह हुन लागेको थाहा पाए कहाँ उजुरी गर्ने, बालविवाहले कस्तो खाल्को शारिरिक समस्या सिर्जजना गर्छ जस्ता बालबालिकोको जिज्ञासामा उपमेयर रन्जितादेवी चौधरी, प्रमुख प्रशासकीय अधिकृत हिराकाजी श्रेष्ठ, बयलवासका प्रहरी निरीक्षक मानप्रसाद श्रेष्ठ, योजना शाखा प्रमुख पुष्करमणि घिमिरे, स्वास्थ्य शाखा प्रमुख सुगेन्द्र महतो, महिला तथा बालबालिका शाखा प्रमुख गायत्रीदेवी चौधरी, शिक्षा शाखाका अधिकृत दिनेश लुइटेल, लगायतले जवाफ दिएका थिए ।

महिला तथा बालबालिका शाखा प्रमुख चौधरीले आफुहरु बालविवाह न्युनिकरणका निम्ति गम्भिर रुपमा लागिपरेको बताउँदै आफुहरुले सडक नाटकको माध्यममबाट पनि यो समस्या हल गराउने प्रयास गर्ने योजना सुनाउनुभयो । बालबालिकाले १६ बर्षमा नागरिकता दिने अनी १८ बर्षमा विवाह गर्दा बालविवाह हुने ? यो कस्तो नियम हो भन्दै राखेको जिज्ञासामा प्रहरी निरिक्षक श्रेष्ठले कानुनी रुपमा केहि उल्झन रहेपनि कानुनले बर्जित गरेको कुरालाई प्रोत्साह गर्नु नहुने तर्क राखेका थिए ।

बालविवाहलाई सरकारले अपराध भनेर निषेध गरे पनि यो बिकृति अझै निराकरण हुन सकेको छैन । सरकारले बालविवाह अन्त्यका लागि विभिन्न रणनीतिक योजना बनाएको छ, तर यसमा उत्साहजनक प्रतिफल पाउन भने मुस्किल परिरहेको छ । सरकार मात्रै नभएर बिभिन्न संघ संस्थाहरुले पनि राष्ट्रिय, अन्तराष्ट्रिय सहयोग जुटाएर बालविवाह न्युनिकरणका लागी भन्दै बिभिन्न कार्यक्रमहरु संचालन गरिरहेका छन । तर बालविवाहको दर भने अपेक्षाकृत ढंगबाट घट्न सकिरहेको छैन । तराई मधेशमा त झन बालविवाहको तथ्यांक डरलाग्दो छ ।

ग्रामीण नारी उत्थान संघकी अध्यक्ष गोमादेवी न्यौपानेको अध्यक्षमा कार्यक्रम सम्पन्न भएको हो ।

लालबन्दी । सर्लाहीको मलंगवामा बिहिवार बिहान प्रदेशस्तरीय संयुक्त विपद् अभ्यास ‘अग्नी नियन्त्रण २०८०’ प्रस्तुत गरिएको छ । श्री भैरवी दल गण पाँच कुमारी ब्यारेक नवलपुरको आयोजनामा मलंगवा १० स्थित तिनबिघे खेल मैदानमा अग्नी नियन्त्रण सम्बन्धि बिपद् अभ्यास गरिएको हो । मुलुकमा हुने हरेक बिपत्तिमा उद्धार, सहयोग र संरक्षणमा अग्र स्थानमा रहने सेनाले हरिपुरको एउटा सानो गाउँको परिकल्पना गरेर सो अभ्यास गरेको हो । सो कार्यक्रम जिल्ला प्रशासन कार्यालय मलंगवा, जिल्ला स्वास्थ्य कार्यालय मलंगवा, जिल्ला रेडक्रस कार्यालय मलंगवा, जिल्ला प्रहरी कार्यालय सर्लाही, शसस्त्र प्रहरी बल नम्बर १० गण, बागमति सेवा समाज, डिभिजन बन कार्यालय र आरआरपिकेसँगको साझेदारीमा सम्पन्न गरिएको हो । तराईका जिल्लाहरुमा वर्षेनि आगलागीका घटना हुने गरेका छन । जसमा मानवीय र भौतिक क्षति हुनुका साथै बनमा लाग्ने डढेलोमा परि जंगली बन्यजन्तुको समेत क्षति हुन्छ ।

अभ्यासमा खाना पकाउन प्रयोग गरिने सिलिण्डरको रेगुलेटरमा आगो सल्केको अवस्थामा कसरी निभाउने, आगो निभाउनका लागी पहिलो औंलाको प्रयोग, दोस्रो बाल्टिनले छोप्ने, तेस्रो, बलिरहेको ग्यास सिलिण्डरलाई तन्ना वा पर्दाले वरीपरीबाट बेरेर बाँधेमा आगो निभाउन बिधिको प्रयोग देखाईएको थियो । त्यसैगरी ठुलो विल्डिङ्गहरुमा लागेको आगोमा फसेका मानिसहरुको उद्धार कसरी गरिन्छ/गर्न सकिन्छ भनेरसमेत देखाईएको भैरवी दल गण पाँच कुमारीका प्रमुख, प्रमुख सेनानी सुर्य बहादुर कार्किले जानकारी दिनुभयो ।

त्यसैगरि बन जंगलमा चुरोट, बिँडि खाँदा वा सलाई, लाईटर जस्ता आगो जन्य बस्तु लिएर जाँदा सावधानी अपनाइएन भने हुन सक्ने आगलागी र क्षतिको बारेमा समेत प्रस्तुति गरिएको थियो । अभ्यासका क्रममा केही व्यक्तिहरू जंगलमा चुरोट सेवन गरेर जथाभावि फाल्दा वनमा आगो लाग्न सुरु भएको, वनमा लागेको आगो गाउँसम्म पगेको, केही घर पुरै जलेर नष्ट भएको, स्थानीयले हार गुहार गरेको र सेनालाई खबर पुगेपछि सेनाको टोली आएर अग्नी नियन्त्रणका लागी गरिएको प्रयासलाई देखाईएको थियो । कार्यक्रममार्फत आगलागीका घट्ना भएमा प्रारम्भिक उद्दार कसरी गर्ने ? घटनाको चारकिल्ला कसरी सुरक्षित राख्ने, विपद्का बेला स्थानीयसँग कसरी समन्वय गर्ने भन्ने कुराको डेमो प्रस्तुत गरिएको थियो । त्यसैगरी घाइतेलाई कसरी प्राथमिक उपचार गर्ने ?, पीडितको पुर्नस्थापना कसरी गराउने ?, गम्भीर घाइतेलाई अस्पतालसम्म कसरी लैजाने ? लगायतका विषय प्रस्तुतिमा समाविष्ट थियो ।

मधेस प्रदेश सरकारका गृह, संचार तथा कानुन मन्त्री राजकुमार लेखीको प्रमुख आतिथ्यमा भएको संयुक्त विपद् अभ्यास कार्यक्रममा जिल्ला समन्वय समिति सर्लाहीका प्रमुख कौशल किशोर सिंह, उपप्रमुख जितेन्द्र कुशवाहा, प्रमुख जिल्ला अधिकारी कोमल प्रसाद धमला, गृह, संचार तथा कानुन मन्त्रालयका सचिव, नेपाली सेनाका पृतनापति उपरथी सुदर्शन सिलवाल, वाहिनीपति सहायक रथी प्रकाश बहादुर चन्द, गणपति प्रमुख सेनानी कार्कि, जिल्ला प्रहरी प्रमुख प्रहरी उपरिक्षक दयानिधि ज्ञवाली, सशस्त्र प्रहरी प्रमुख, विभिन्न पालिकाका प्रमुख, नागरिक समाज, संघसंस्थाका प्रतिनिधि, विद्यार्थीहरु, जिल्लाका संचारकर्मिहरुको बाक्लो उपस्थिति रहेको थियो ।

कार्यक्रमस्थलमा विपद्को बेला प्रयोग हुने उद्धार सामाग्रीहरुको समेत प्रदर्शन गरिएको थियो ।