सर्लाही । सर्लाहीको हरिपुर नगरपालिका–४, हरैयामा एक महिलाको हत्या भएको छ । स्थानीय ठगा रायकी ४५ वर्षीया श्रीमती कृष्णादेवी रायको हत्या भएको हो । कृष्णादेवीको शव शनिवार राति अबेर घरदेखि करिब पाँच सय मिटर पूर्व आफ्नै मकै खेतमा फेला परेको जिल्ला प्रहरी कार्यालय सर्लाहीले जनाएको छ ।
महिलाको शव फेला परेकोबारे शनिवार राति ९ः३० बजे प्रहरीमा खबर प्राप्त भएपछि इलाका प्रहरी कार्यालय हरिपुरबाट प्रहरी निरीक्षक र जिल्ला प्रहरी कार्यालयबाट प्रहरी उपरीक्षकको नेतृत्वमा प्रहरी टोली घटनास्थलमा पुगेको थियो । जिल्ला प्रहरी कार्यालय सर्लाहीका प्रहरी उपरीक्षक रवीन्द्रबहादुर सिंहले मृतक महिलाको शरीरमा चोटपटक देखिएकाले घटना शङ्कास्पद रहेको बताए ।
‘घटना शङ्कास्पद रहेकाले हामी अनुसन्धानमा लागिरहेका छौं’, एसपी सिंहले भने, ‘हरिपुरको स्थानीय प्रहरी र जिल्लाबाट समेत परिचालित टोली प्रमाण जुटाउन लागिरहेको छ ।’ परिवारका सदस्यका अनुसार कृष्णादेवी घाँस काट्न भनी शनिवार अपराह्न ४ बजेपछि घरबाट खेततर्फ गएकी थिइन् । साँझ अबेरसम्म पनि घर फर्किएर नआएपछि श्रीमानसहित छरछिमेकी खोज्न मकै खेतमा जाँदा उनको शव फेला परेको हो । घटनास्थलको प्रकृति मुचुल्का गरी मृतक महिलाको शव पोस्टमार्टमका लागि प्रादेशिक अस्पताल मलङ्गवामा राखिएको छ ।
काठमाडौँ : नेपाल आयल निगमले पेट्रोलियम पदार्थको मूल्यवृद्धि गरेको छ।
निगमले असार १७ गतेदेखि लागू हुने गरी पेट्रोलमा प्रतिलिटर २ रुपैयाँ र डिजेल तथा मट्टीतेलको मूल्य प्रतिलिटर ५ रुपैयाँ बढाएको सूचना जारी गरी जानकारी दिएको छ। हवाइ इन्धन र एलपी ग्यासको भाउ भने घटबढ भएको छैन। बढेको मूल्य आज राति १२ बजेपछि लागू हुनेछ।
मूल्यवृद्धिपछि काठमाडौं, पोखरा र दिपायलमा पेट्रोलको मूल्य प्रतिलिटर १६७ रुपैयाँ र डिजेल तथा मट्टीतेल प्रतिलिटर १५७ रुपैयाँ पर्नेछ।
त्यसैगरी झापा, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्जमा वरपर पेट्रोलको मूल्य प्रतिलिटर १६४.५० र मट्टीतेल तथा डिजेल प्रतिलिटर १५२.५० रुपैयाँ पर्नेछ।
सुर्खेत र दाङमा पेट्रोल प्रतिलिटर १६६ र डिजेल तथा मट्टीतेल १५६ रुपैयाँ पर्नेछ।
बारा : बारास्थित पर्सा राष्ट्रिय निकुञ्ज क्षेत्रमा चोरी सिकारीमा संलग्न एक व्यक्तिको सेनाले प्रहार गरेको गोली लागेर मृत्यु भएको छ। मृत्यु हुनेमा हेटौंडा उपमहानगरपालिका–१४ बनेलधापका अन्दाजी ५५ वर्षीय शुक्रबहादुर तितुङ छन्।
त्यहाँ सुरक्षार्थ तैनाथ नेपाली सेना र निकुञ्ज प्रशासनका कर्मचारीसहित नियमित गस्तीमा रहेको टोलीमाथि पकडीवास ठूलोथलीमा सिकारीको समूहले फायर खोल्दा सेनाले जवाफी फायरिङ गरिएको सेनाले जनाएको छ।
हतियारसहित निकुञ्ज इलाकामा प्रवेश गरेका सिकारीलाई नभाग्न चेतावनी दिँदा उल्टै सेनाको टोलीमाथि शिकारी समूहले फायरिङ गरेपछि सेनाको गस्तीले जवाफी फायरिङ गर्नुपरेको सैनिक जनसम्पर्क तथा सूचना निर्देशनालयले जनाएको छ।
सेनाको जवाफी फायरिङपछि भागेका शिकारीको टोलीलाई घटनास्थल वरपर खोज्दै जाँदा एक जना मृत अवस्थामा फेला परेका सेनाले पुष्टि गरेको छ।
घटनास्थलबाट सेनाले दुई नाल भरुवा बन्दुक र शिकारीले प्रयोग गरेका बन्दोबस्तीका सामग्री फेला परेको जानकारी दिएको छ।
अम्लेश्वर मध्यवर्ती सामुदायिक वन समितिका प्रतिनिधि, स्थानीय निकायका प्रतिनिधि, निकुञ्ज प्रशासन तथा इलाका प्रहरी कार्यालय सिमराबाट खटिएको प्रहरीद्वारा घटनासम्बन्धी अनुसन्धान तथा मृतकको मुचुल्का उठाइ शवको पोस्टमार्टमका लागि सम्बन्धित स्वास्थ्य संस्थामा पठाइएको पनि सेनाले जानकारी दिएको छ।
के तपाईंले कहिल्यै आफ्नो पिसाबको रङ याद गर्नुभएको छ? प्रश्न अनौठो लाग्न सक्छ तर यसमा हाम्रो स्वास्थ्यका धेरै रहस्य लुकेका छन्। पिसाबको रङले हाम्रो स्वास्थ्यस्थितिबारे बताउन सक्छ। पिसाबको रङ कहिले पहेँलो, कहिले खैरो, कहिले गुलाबी र कहिले पानीजस्तो हुन्छ। पिसाबका यी सबै रङहरूको कुनै न कुनै अर्थ हुन्छ।
पिसाबको रङ हल्का पहेँलो छ भने यसलाई राम्रो स्वास्थ्यको संकेत मान्न सकिन्छ। जबकि निर्जलीकरणका कारण पिसाबको रङ खैरो हुन सक्छ।
जयपुरस्थित नारायण अस्पतालका नेफ्रोलोजी विभागका वरिष्ठ परामर्शदाता डा. कमल कासवान पिसाबको रङलाई ध्यानमा राख्ने हो भने आफूलाई लाग्ने रोगका बारेमा जानकारी हुने र सजिलै उपचार गर्न सकिने बताउँछन्।
डा. कासवान भन्छन्, ‘पिसाबको रङ परिवर्तन हुनेबित्तिकै रोग लागेको भन्ने हुँदैन। कहिलेकाहीँ खानपानका कारण पनि पिसाबको रङ परिवर्तन हुन सक्छ। तर खानपानले पिसाबको रङ परिवर्तन भएको हो अथवा रोगका कारण भैरहेको छ जानकारी राख्नु पर्छ।’
पहेँलो रङ
सामान्यतया पिसाबको रङ हल्का पहेँलो हुन्छ। पिसाबमा युरोक्रोम नामक तत्व हुन्छ, जसले यसलाई पहेँलो बनाउँछ। हामीले जति धेरै पानी पियौँ, त्यति युरोक्रोम पातलो हुन्छ र यसको रङ कम पहेँलो हुन्छ।
हाम्रो रगतमा भिटामिन बीको मात्रा बढी भएमा पनि पिसाबको रङ पहेँलो हुन्छ। पिसाब हल्का पहेँलो रङको हुनु राम्रो स्वास्थ्यको संकेत हो।
सुन्तला रङ
पिसाबको रङ सुन्तला देखिनु डिहाइड्रेसनको लक्षण हुन सक्छ। पिसाबको रङ सुन्तला भएको खण्डमा मानिसलाई जन्डिसको संकेत पनि दिन्छ।
त्यस्तै, विभिन्न रोगका औषधिको सेवनले पनि पिसाबको रङ सुन्तला बनाउँछ।
गुलाबी वा रातो
चुकन्दर र ब्लुबेरीजस्ता प्राकृतिक रूपमा गाढा रङका फलफूलहरू खाँदा पिसाब रातो वा गुलाबी रङको हुन सक्छ। तर गुलाबी अथवा रातो रङको पिसाबले कहिलेकाहीँ रोगको संकेत पनि गर्ने गर्छन्। प्रोस्टेट बढ्दा, मिर्गौलामा पत्थरी हुँदा र मिर्गौलामा ट्युमर हुँदा पनि पिसाबको रङ रातो अथवा गुलाबी हुने गर्छ। यस्तो अवस्थामा पिसाबबाट रगत समेत बग्छ।
नीलो वा हरियो
स्युडोमोनास एरुगिनोसा ब्याक्टेरियाको संक्रमणका कारण पिसाबको रङ नीलो हुने गर्छ।
धेरै खैरो वा कालो
पिसाबको रङ केही औषधिको साइड इफेक्टका कारण खैरो हुन सक्छ। धेरै मात्रामा एलोभेरा वा सिमीको सेवनले पिसाबको रङ गाढा खैरो वा कालो हुन सक्छ। कलेजोको समस्याले पिसाबमा पित्त देखा पर्न सक्छ। यसले पिसाबको रङ पनि गाढा खैरो हुन सक्छ।
गर्भावस्थाको समयमा पिसाबको रङ बादल, सेतो वा दूधजस्तो देखियो त्यो खतराको संकेत हो। यस्तो अवस्थामा तुरुन्तै चिकित्सकको सल्लाह लिनुपर्छ।
सर्लाही : सर्लाहीको हरिवन नगरपालिकाले आफ्नो जनस्वास्वास्थ्य नीतिको मस्यौदा तयार गरेको छ।
गैर सरकारी संस्था फेक्ट नेपाल र सिविन नेपालसँगकाे सहकार्यमा हरिवन नगरपालिकाले जनस्वास्थ्य नीतिको मस्यौदा बनाएको हो।
बिहीबार काठमाडौँको कीर्तिपुर अस्पतालमा आयोजित कार्यक्रमकामा फेक्ट नेपाल र सिविन नेपालले हरिवन नगरपालिकाका मेयर रमेश बुढाथोकी (कमल)लाई जनस्वास्थ्य नीतिको मस्यौदा हस्तान्तरण गरे।
देशकै नाम कहलियका जनस्वास्थ्यविद् र हरिवनका सरोकारवाला स्थानीय जनसमुदाय समेतको सहभागितामा हरिवन र काठमाडौँमा भएका विभिन्न छलफल र अन्तरक्रियाका सुझावहरुलाईसमेत समेटेर हरिवन नगरपालिकाले जनस्वास्थ्य नीति तयार गरेको हो।
त्यसका लागि झण्डै सात महिना समय लागेको मेयर बुढाथोकीले जानकारी दिए। उनले हरिवन नगरपालिकाले जनताको स्वास्थ्य उपचारको दायित्व लिने उद्देश्य राखेर जनस्वास्थ्य नीति तयार गरेको बताए।
‘यो नीति हामीले जनताको स्वास्थ्य उपचारको दायित्व नगरपालिकाले लिने उद्देश्य राखेर निर्माण गरेका हौँ,’ उनले भने, ‘संविधानको मर्मअनुसार घर छेउकै सरकारले जनताको स्वास्थ्य उपचारको दायित्त्व लिनुपर्छ। त्यो मर्मलाई यो जनस्वास्थ्य नीतिले सम्बोधन गरेको छ।’
उनले नगरवासी जनताको स्वास्थ्यलाई ध्यान दिएर हरिवन नगरपालिकाले स्थानीय स्वास्थ्य संस्थालाई सुविधायुक्त बनाउँदै लगेको बताए। ‘स्वास्थ्य उपचारसँगै हामीले नगर क्षेत्रका विभिन्न ठाउँमा योग र ध्यानका शिविर, चुरे क्षेत्रमा पदमार्ग र पार्कहरुसमेत निर्माण गर्दै गएका छौँ,’ मेयर बुढाथोकीले भने।
कार्यक्रममा फेक्ट नेपालका डा.शम्भु प्रसाद उपाध्यायले हरिवनको जनस्वास्थ्य नीति संविधानको मर्म, सामाजिक न्याय, अन्तर्राष्ट्रिय अभ्यास जस्ता विषयलाईसमेत ध्यानमा राखेर निर्माण गरिएको जानकारी दिए।
‘जनताको आधारभूत स्वास्थ्यको दायित्व नगरपालिकाले लिनेगरी यो जनस्वास्थ्य नीति तयार भएको छ,’ उनले भने, ‘यो जनस्वास्थ्य नीतिले हरिवनको स्वास्थ्यका उपलव्धी, समस्या र चुनौतिलाई सम्बोधन गर्ने विश्वास मैले लिएको छु।’
कार्यक्रममा पाटन अस्पतालका प्राडा केदार बरालले हरिवन नगरपालिकाले तयार गरेको स्वास्थ्य नीति जनपक्षीय भएको बताए।
कार्यक्रममा फेक्ट नेपालका कार्यकारी निर्देशक गौरी प्रधानले देशकै राष्ट्रिय स्वास्थ्य नीति तयारी गर्न सक्ने विज्ञहरुको सहभागितामा हरिवन नगरपालिकाले आफ्नो जनस्वास्थ्य नीति तयार गरेको भन्दै प्रशंसा गरे।
कार्यक्रममा सिविन नेपालकी कार्यकारी निर्देशक सुम्निमा तुलाधरले जनस्वास्थ्य नीति तयार गरेर हरिवन नगरपालिकाले देशैभरीका स्थानीय पालिकाहरुका लागिसमेत उदाहरणीय काम गरेको बताइन्।
हरिवन नगरवासीसमेत रहेका सिविनका कार्यक्रम संयोजक कुमार भट्टराईले हरिवनको जनस्वास्थ्य नीति कार्यान्वयनमा सिविन र फेक्ट नेपालले पछिसम्म पनि सहकार्य गर्दै जाने बताए।
काठमाडौं : उपप्रधानमन्त्री एवं परराष्ट्रमन्त्री नारायणकाजी श्रेष्ठ एसिया सहयोग संवाद (एसिडी)का सदस्य राष्ट्रका विदेशमन्त्रीहरूको १९ औँ बैठकमा भाग लिन शनिबार इरान जाँदै छन्।
इरानको राजधानी तेहरानमा असार १० गते आयोजना हुने उक्त बैठकमा सहभागी हुन नेपाली प्रतिनिधिमण्डलको नेतृत्व गर्दै त्यसतर्फ प्रस्थान गर्न लागेको परराष्ट्र मन्त्रालयले जनाएको छ । उपप्रधानमन्त्री श्रेष्ठले बैठकका अवसरमा सदस्य राष्ट्रका विदेशमन्त्रीहरूसँग द्विपक्षीय भेटवार्ता गर्ने कार्यक्रम छ ।
मन्त्रिस्तरीय बैठक अघि मन्त्रालयको क्षेत्रीय संगठन महाशाखाका सहसचिव ज्ञानबहादुर मगरले यही असार ९ गते हुने एसिडीका वरिष्ठ अधिकारीको बैठकमा भाग लिनेछन्।
उपप्रधानमन्त्री श्रेष्ठ यही असार १२ गते स्वदेश फर्किने छन्।
काठमाडौं । किशोरीमाथि जबरजस्ती करणी गरेको आरोपमा नेपाल प्रहरीका जवान पक्राउ परेका छन् । १७ वर्षकी किशोरीमाथि जबरजस्ती करणीको आरोपमा प्रहरी जवान २४ वर्षका सन्तोष बोट पक्राउ परेका हुन् । किशोरीले आफूमाथि जबरजस्ती करणी भएको व्यहोराको जाहेरी पत्र दर्ता गरेपछि उनलाई पक्राउ गरेको जिल्ला प्रहरी कार्यालय मकवानपुरका एसपी सीताराम रिजालले जानकारी दिए । पक्राउ परेका सन्तोष प्रहरी चौकी भार्तामा कार्यरत थिए । उनको घर कञ्चनपुर हो ।
घटनामा आफ्नै जवान मुछिएपछि प्रहरीका अधिकारीहरूले घटना लुकाउन हरप्रयास गरेको पनि देखिन्छ । जेठ १६ मा परेको जाहेरीमा किशोरीमाथि अन्तिम पटक जेठ ११ गते जबरजस्ती करणी भएको उल्लेख गरेकी छन् । जवान सन्तोषलाई प्रहरीले जेठ १६ गते नै पक्राउ गरेको जनाएको छ । तर यसबारे सूचना प्रहरीले बाहिर ल्याएन । पीडित किशोरी कक्षा–८ मा पढ्छिन् ।
‘यो घटना जेठकै हो । घटना प्रहरीले लुकाउनु पर्ने कुनै कारण छैन’, एसपी रिजालले भने, ‘लुकाउने भए त अनुसन्धान नै हुन्थेन होला नि । हामी अनुसन्धान गरिरहेका छौं ।’ आफ्ना अभिभावक कोही नभएकी ती किशोरीमाथि पटक–पटक करणी भएको जाहेरीमा उल्लेख छ ।
किशोरीले प्रहरी चौकीको भान्सा कोठामा लगेर सन्तोषले पटक–पटक जबरजस्ती करणी गरेको भनेकी छन् । उनले जाहेरीमार्फत अन्तिम पटक जेठ ११ गते आफू बस्दै आएको कटुन्जेस्थित छात्रबासको भान्सामा जबरजस्ती करणी गरेको बताएकी छन् । अनुसन्धानका क्रममा उनीहरूबीच ८ महिना अघिदेखि चिनजान भएको पाइएको मकवानपुर प्रहरीले जनाएको छ ।
ठमाडौँ : चालु आर्थिक वर्षको ११ महिनामा १४ खर्ब ५३ अर्ब ७० करोड रुपैयाँ बराबरको आयात भएको छ ।
भन्सार विभागका अनुसार गत आर्थिक वर्षको ११ महिनामा आयातमा १.८४ प्रतिशतले गिरावट आएर १४ खर्ब ५३ अर्ब ७० करोडको आयात भएको हो ।
त्यस्तै गत बर्षको तुलनामा चालु आर्थिक वर्ष निर्यात ३.०१ प्रतिशतले घटेको छ । चालु आर्थिक वर्षको साउनदेखि जेठसम्मम १ खर्ब ३९ अर्ब २६ करोड रुपैयाँको वस्तु निर्यात हुँदा गत आर्थिक वर्ष सोही अवधिमा १ खर्ब ४३ अर्ब ५८ करोढ रुपैयाँको वस्तु निर्यात भएको थियो ।
आयात र निर्यात घटेसँगै व्यापार घाटा पनि १.७२ प्रतिशतले घटेको छ । गत आर्थिक वर्ष १३ खर्ब ३७ अर्ब ३९ करोड रुपैयाँ व्यापार घाटा हुँदा चालु आर्थिक वर्षको सोही अवधिमा १३ खर्ब १४ अर्ब ४४ करोड रुपैयाँ पुगेको हो ।
विदेशी मुलुकबाट आयात हुनेमा डिजेल, पेट्रोल, एलपीजी ग्यास छन् । ११ महिनामा सबैभन्दा बढी १ खर्ब २९ अर्ब २० करोड रुपैयाँ बराबरको डिजेल आयात भएको छ । त्यस्तै यस अवधिमा ६२ अर्ब ८७ करोड रुपैयाँ बराबरको पेट्रोल आयात गरिएको छ । त्यस्तै ५१ अर्ब ७ करोड २६ लाख बराबरको एलपीजी ग्याँस आयात भएको विभागले जनाएको छ ।
त्यस्तै मुलुकबाट निर्यात हुनेमा सबैभन्दा बढी गलैंचा, अलैंची,फलाम तथा स्टिल रहेका छन् । चालु आर्थिक वर्षको ११ महिनमा ९ अर्ब ७३ करोड १८ लाख रुपैयाँ बराबरको गलैंचा निर्यात भएको छ भने ७ अर्ब ४७ करोड श्ररुपैयाँ बराबरको अलैंची निर्यात भएको छ । त्यस्तै ६ अर्ब १६ करोड ६० लाख बराबरको स्टिल निर्यात भएको विभागले जनाएको छ ।
काठमाडौँ । नेपाल पत्रकार महासङ्घले आगामी असार २२ गते मतदान गर्नेगरी महाधिवेशनको निर्वाचन कार्यतालिका सार्वजनिक गरेको छ । महासङ्घको केन्द्रीय निर्वाचन समितिले शुक्रबार निर्वाचन कार्यतालिका सार्वजनिक गरेको हो ।
निर्वाचन कार्यतालिकाअनुसार असार २२ गते बिहान ९ बजेदेखि साँझ पाँच बजेसम्म मतदानका लागि समय तय गरिएको छ । उम्मेदवारको मनोनयन दर्ता असार १३ गते र उम्मेदवारको नामावली प्रकाशन पनि सोही दिन गरिने छ । उम्मेदवारको अन्तिम नामावली असार १५ गते प्रकाशन गरिनेछ ।
यस्तै असार १३ गते प्रकाशन गरिने छ भने उम्मेदवारको नामावली उपरको दाबी विरोध असार १३ गतेदेखि असार १५ गतेसम्म तोकिएको छ । असार १० गतेसम्म मतदाता नामावली उपर दावी विरोधको समय निर्धारण गरिएको छ । असार १२ गते अन्तिम मतदाता नामावली प्रकाशन गरिने निर्वाचन समितिले जनाएको छ ।
लालबन्दी । सर्लाहीमा बिहिवार भएको दुई छुट्टा छुट्टै दुर्घटनामा परि ४ जनाको मृत्यु भएको छ । बिहान सवा ६ बजे पुर्व पश्चिम राजमार्ग अन्तर्गत बागमति १ रायमाझि चोकमा बस दुर्घटना हुँदा ३ जनाको मृत्यु भएको छ । सडक छेउमा रोकि राखेको NL01AH9252 नम्बरको लरिमा बस ठोक्किएको थियो ।
पश्चिमबाट पुर्वतर्फ जाँदै गरेको लु १ ख ८८४८ नम्बरको बसले अर्को बसलाई ओभरटेक गर्ने क्रममा बस लरिको पटाडीको भागमा ठोक्किन पुगेको थियो । सो दुर्घटनामा परि रुपन्देहि जिल्लाको मायादेवी गाउँपालिका ३ का ८५ बर्षिय दशरथ कोहार, सोहि ठाउँका बर्ष ५० का रामकरण केवट र सोहि जिल्लाको देवदह नगरपालिका ११ बस्ने बर्ष ७० का कृष्णा चौधरीको मृत्यु भएको छ । अन्य १७ जना भन्दा बढि घाईते भएका छन । जिल्ला प्रहरी कार्यालय सर्लाहीका सुचना अधिकारी डिएसपी दिपक श्रेष्ठले बसमा ४० जना यात्रु सवार रहेको बताए । उनले बस चालक ईलाका प्रहरी कार्यालय हरिवनको नियन्त्रणमा रहेको र लरि चालक फरार रहेकोले खोजी कार्य चलिरहेको बताएका छन ।
त्यसैगरि दिउँसो साँढे ११ बजेतिर नेपाल टेलिकम बरहथवा ५ मा काम गर्ने एक मजदुरको करेन्ट लागेर ज्यान गएको छ । टेलिकमको अफिसमा काम गर्ने क्रममा बरहथवा १० का बर्ष २१ का आबोध ठाकुरको करेन्ट लागेर ज्यान गएको हो । करेन्ट लागेर उनका भाई बर्ष १९ को आनन्द ठाकुर घाईते भएका छन । काम गर्ने क्रममा दुई दाजुभाईलाई नै करेन्ट लागी घाईते भएपछि तत्कालै सरस्वति अस्पताल हरिवनमा उपचारका लागी लगीएकोमा दाई आबोधको मृत्यु भएको प्रहरीले जनाएको छ ।
